SOGGIRA E… NORA
NORA
Tu si cchiù vilinusa d'un serpenti
e jò cu tia tranquilla 'un pozzu stari;
d'aviri a ciancu a tia, è megghiu nenti,
pi jiri contru a mia…dassi dinari !
Mi pari di l'Esercitu un tenenti,
chi tuttu 'u munnu voli cumannari,
ma levatillu ormai di la to menti:
to figghiu sta cu mia, e 'un aj chi fari !
SOGGIRA
Lu fattu sai qual'è, bidduzza mia ?
C''u focu cu la pagghia 'un ci avi a stari,
jò sugnu fimminedda comu a tia,
perciò pi fissa nun mi poi pigghiari !
La me prisenza, si ti fastiddìa,
picchì li fatti toi nun ti poi fari…
ma prima c''u mortoriu scampanìa,
tutti 'i minuti jò, t'avvilinari !
Traduzione letteraria SUOCERA E NUORA
NUORA: Tu sei più velenosa di un serpente / ed io con te tranquilla non posso stare; / d'avere al fianco te, è meglio niente, / per andare contro di me…daresti denari ! / Mi sembri dell'esercito un tenente, / che tutto il mondo vuole comandare, / ma levatelo ormai dalla tua mente: / tuo figlio sta con me, e non hai che fare ! / SUOCERA: Il fatto sai qual è, bellezza mia ? / Che il fuoco con la paglia non ci deve stare, / io sono femminuccia come te, / per questo in giro non mi puoi pigliare ! / La mia presenza, si, t'infastidisce, / perchè i fatti tuoi non ti puoi fare…/ ma prima che il mortorio suonerà, / tutti i minuti io, ti devo avvelenare !
NORA
Mi sentu controllata ogni mumentu:
si' nesciu la matina, ti lamenti;
si' m'arricampu tardu, già lu sentu:
- di puliziari, certu, 'un avi nenti ! -
Mi spunti 'n casa sempri a trarimentu,
diventi russa si' ci trovi genti,
c''u mussu strittu, poi, mi dici a stentu:
- a chissu 'un lu canusciu, è to parenti ? -
SOGGIRA
Ti senti controllata, ma chi dici;
picchì va cunti fatti minzugneri ?
Inveci 'i sparlittiari cu l'amici…
picchì 'un ti pulizzii li cantuneri1 ?
Ormai aviti 'a scusa di l'uffici
e nun vuliti fari cchiù 'i mugghieri;
di la famigghia ormai tu si la vici:
lu figghiu meu lu tratti cu li peri !
NORA
Poi nun parlamu di li picciriddi,
li vízzi d''a matina finu â sira
e tutti 'i tinturìi, li passi a iddi
e li vuredda mei fannu tri gira;
addivintati beddi comu stiddi,
quannu 'u papà la sira s'arritira.
Mi stai facennu pèrdiri 'i capiddi:
pi mòriri, si peggiu di la cira !
SOGGIRA
Tu nun pinsari mai, ascuta a mia,
chi nun avrai mutivu di sbagghiari,
è un jocu 'i nenti, pèrdiri la via,
quannu 'u maritu, è fora a travagghiari;
e si "sta vecchia" 'i figghi t'avvizzìa,
lu fa pi la to assenza accuppunari,
e si sta cosa poi, nun piaci a tia:
picchi ogni jornu mi li voi lassari ?
NUORA: Poi non parliamo dei bambini, / li vizzi dalla mattina fino alla sera / e tutte le cattiverie, le passi a loro / e le mie budella fanno tre giri; / diventate belli come stelle, / quando il papà la sera si ritira. / Mi stai facendo perdere i capelli: / per morire, sei peggio della cera ! / SUOCERA: Tu non pensare mai, ascolta a me, / che non avrai motivo di sbagliare; / è un gioco da niente, perdere la via, / quando il marito, è fuori a lavorare; / e se " questa vecchia" i figli ti vizia, / lo fa per la tua assenza coprire, / e se questa cosa poi, non piace a te: / perchè ogni giorno me li vuoi lasciare?
SOGGIRA
Ascuta 'i me cunsigghi, 'un fari storia,
la vita è bedda chi nun poi pinsari,
nun sugnu "sperta"…usu la memòria:
è l'esperienza chi mi fa parlari !
D''u beni chi tu fai, nun avrai gloria,
nun sempri tu la sperta potrai fari
e quannu sarai sòggira, sta boria,
'na murvusedda…t''a farà calari !
1 Cantunera: canto, ch'è l'angolo esteriore (o interno) di una fabbrica.
- 4° CLASSIFICATO alla 22^ ediz. del premio internazionale di letteratura "Phintia 2005"
Ascolta i miei consigli, non fare storie, / la vita è bella che non puoi pensare, / non sono "furba"…uso la memoria: / è l'esperienza che mi fa parlare ! / Del bene che tu fai, non avrai gloria, / non sempre tu la furba potrai fare / e quando sarai suocera, questa alterigia, / una mocciosetta…te la farà passare !
|
|
per Giuseppe Vultaggio
e-mail -