V Tempo - «Giugnettu di lu Signuri»
Poesia: La storia di l'agghi

Fù n'annata chi l'agghi ianu cari
na notti mè mugghieri mi ricia:
ovannu l'agghi tu l'ha siminari
mannò nun ti curchi chiù cu mia;
ma la simenza l'havia accattari
e ghìo na lira nun la pussiria
mi dissi: ti ni vai a risciuppari
com'è chi fici mè cugnatu 'Ndria.

Prima chi la ricota havia finutu
pi putiri quattru agghi capitari
na matinata scivi risulutu
pi fari na rangata risciuppari
mi vitti n'abbunatu conusciutu
Ninu Stuppagghiu lu vogghiu vantari
mischinu mi chiamau tantu curtesi
e qualchi vinti testi mi ni resi.

Iò lu ringraziavi immenzamenti
cu tanta ducazioni e timpiranza
e iddu rispunniu: cosa di nenti
dù testi d'agghia chi hannu mpurtanza,
tempu di ricota specialmenti
ntra li campagni c'esti l'abbunnanza
e nqualunchi abbunatu ti prisenti
ti li rigala comu amurusanza.

Ma iddu sulu fù tantu amurusu
sta bon' azioni fù capaci falla
haiu firriatu cca supra, dda ghiusu
massimamenti ura di nfascialla,
taliava a tutti attusu, attusu
la vucca era sempri parla un parla;
ma pi natura mia sempri affruntusu
un'agghia un mi firai dumannalla.

Haiu na soru natri quattru frati
pi ducazioni mi pozzu vantari
di nichi, nichi ci fomu nsignati
chi cosi nun si n'hannu a dumannari
si pigghiati quattru agghi e mi li rati
vi pozzu a unu a unu ringraziari;
ma siddu li vuliti dumannati
iò stu piaciri un v'u fazzu passari.

Quannu sta Puisia ci ricitai
picciotti e vecchi nun vittiru chiui
di tannu mpoi di unni passai
mi ravanu li cucchi a dui a dui;
iò tutti ni don Leddu li mpustai
a Nubia ci fù lu fui, fui
e na matina versu culazioni
mi li mannaru cun motu furgoni.

Prima tutta la terra priparai
iornu pi ghiornu na gran matinata
sessanta cucchi ci ni siminai
facennuci chiossai di na zappata,
li brogni a una a una ci tirai
cottu a lu suli tutta la iurnata
na giugnu li scippavi e li nfasciai
li lassu nchianu tutta a stagiunata.

Doppu mi cuminciau lu chiffari
a tutti li sinzali scuncicai
cu mè muggheri un vosi chiù scurari
pi ottu misi mancu ci parlai,
nsettemmaru mi l'hivi a carricari
dintra di lu stalluni l'abbirsai
«poi pi sbarazzari lu stalluni
ci li purtai a lu stazzuni».

Guglielmo Castiglia