V Tempo - «Giugnettu di lu Signuri»
Poesia: LU SCILOCCU

(U latru arrobba ognunu lu viri e nun c'è liggi chi lu pò puniri)

Liggivi un versu di Pippinu Fruci
ludava tantu la spiga di granu
dicia: chi lu sò fruttu tantu duci
è alimentu pi l'essiri umanu;
finu a ghiorna narrè la stessa vuci
l'havia fattu iò chi sù viddanu;
ma quannu vitti chiddu chi successi
canciai lu sonu, li canti e li versi.

Doppu n'annata di stenti e fatichi
cu spisi di cuncimi e di lavoru
taliavanu cu preu ddi longhi spighi
lucenti, ncuraddati comu l'oru;
gioia pi tutti, pi granni e pi nichi
quannu chi ncasa c'è pani e ristoru
ma lu sciloccu fitusu e birbanti
ni fici fari un vuccuni nvacanti.

All'unnici di giugnu fici festa
lu sciluccazzu cu slanciu furiusu
scippau li reschi, li ciccia, la nmesta
lassannu sulu un fustu fora usu;
ogni viddanu cu li manu ntesta
dicia: Diu meu, sugnu cunfusu;
si nun ci penza lu nostru guvernu
ch'annu a manciari i mè figghi st'nvernu?