|
Quannu pi la via di la me Trapani
passavanu annacati li Misteri,
la genti s'affacciava cu la facci seria.
Lu tammuru chi signava u tempu,
era da prucissioni un tristi segnu.
E jò, nicu criaturu, cu l'occhi spirtati
taliava scantatu l'incappucciati.
Me matri, chi pi manu mi tinìa,
"Veni, nun ti scantàri!", mi dicìa!
E tantu rossu mi parìa 'U Signuri cà cruci 'ncoddu,
chi pi talìari giustu, quasi mi stuccava 'u coddu.
Mentri d'acciancu 'na trumma forti sunava,
jò chi manu l'aricchi m'attuppava.
Ogni tantu aisava l'occhi versu mè matri
e la vidia chianciri amari lacrimi.
A li voti 'nta lu sciallu di lana niuru
idda pinsava a lu duluri di Nostru Signuri.
E iddu, chi parìa chi la taliàva,
fissava li so' occhi e la tranquillizzava.
Ora chi sugnu vecchiu, sulu e malatu,
mi viu li Misteri a lu vastuni appuiatu!
Talìu 'u Signuri ca cruci 'ncoddu
e ancora ora mi fà mali 'u coddu.
Li lacrimi chi mi surcarunu la facci
un sunnu pu duluri chi haiu 'nta li ossa:
'U me pinseri mi riporta tantu luntanu...
quannu i Misteri li vidìa cu mè matri
...manu manu!
|
e-mail -
