|
Pensu chi quann'era picciutteddu
vinia la festa di cannalivari,
e s'ammazzava u porcu, u sciaraveddu
pàpari e uzzi tinti di spinnari,
o puru na addina, un picciuneddu
pi putiri la tavula abbunnari.
Ma cu sapuri e u sciauru di tannu,
chi su ricorda magari me Nannu.
'Mpropositu di Nannu si usava,
vestiri u Nannu di Cannalivari,
e poi a prucissioni si purtava:
finu a la Chiàzza, pì fari attintari
lu soccu a li parenti ci lassava.
Poi un libbru si vidia affacciari
d'unni chi c'era scrittu: tistamentu
di sordi di saluti e sintimentu.
E lu Nutaru 'ncuminciava adiri:
A me figghiu Ninu ch'è 'ngigneri,
chi di saluti e liggi n'è a putiri,
ci lassu lu feu di Rampinzeri,
tuttu lu locu di Bedduvidiri
e massaria e feu di Vinnigneri.
A me figghiu Vanni l'Avvucatu
'mprisusu, chiacchiaruni e ribbusciatu
ci lassu lu cummerciu di lu vinu,
lu stabilimentu di lu salatu,
unnici parti e mmezzu a lu bacinu
e li canala e i cuti du Majatu.
A me figghiu Cicciu ch'è Parrinu
datu ch'è 'nfallimentu lu Papatu
ci lassu du miliardi pi cuntanti
pi fari un granni (Buncar) pi Santi.
A me figghia Tiziana a dutturissa,
lassu u palazzu cu la farmacia,
li feura di Pispisa e Cuntissa,
di li trasporti e viaggi l'Agenzia
'cu l'assicurazioni in via Lissa
e lu negozziu di pellicceria.
E poi a la fini: la benificenza,
di certi genti digni d'assistenza.
Centu miliuna lassu a ogni pirsuna
comu chiddi di l'AIDS appigghiati,
a chiddi mangiatari e belantruna,
cumprisu li nudisti e li drugati
e a li sturienti, certi passuluna
chi stannu tuttu l'annu mascarati.
E a la fini, sennu a la chiusura
ringraziu a cu capisci stà littura.
Turi Sucameli
|
e-mail -
