Fu sfardusa cu nui matri natura
quannu nni retti la bedda racina
ch'esti rimediu barsamicu e cura,
speci s'esti manciata di matina !
Ma stu gran' fruttu ch'è tantu priziusu
centu voti mi pari cchiù 'mpurtanti
quannu adidventa sucu liqüurusu
veru purtentu di Diu di li Santi !
Dui cosi fici boni la natura
la fìmmina e lu vinu; cchiù 'ncuetanti
di certu lu sicunnu! Chi turtura
sidd'un ci fora 'stu sucu 'mmiacanti
chi tutti di dilizzi nni prucura,
pensu, cchiù duci di la donna amanti
picchì cchiù longu lu piaciri dura
picchì l'effetti sunnu cchiù custanti !
Pomai chi 'na buttigghia ti trarisci
o chi ti lassa sulu 'nna li vai
chi sempri ti cunsola e ti capisci
t'esti vicina e nun ti lassa mai!
L'esistenza di Diu la si capisci
di tanti cosi beddi chi nni retti
picchi fici lu mari cu li pisci
e tanti beni precisi e perfetti,
ma la prova ch'esisti 'a Pruvirenza
esti lu vinu chi fu lu prisenti
chi fari potti sulu 'na putenza
ch'esti pivveru, certu' onniputenti !
|
e-mail -
