E pensu a la nuvena
da festa di Natali
chi senza messiscena
paria eccezzionali :
cu l'organu chi sona
'na musica 'ntunata
e l'accordu rintona
pi tutta la navata,
lu coru chi nni canta
ruci l'avimaria
e l'animu s'incanta
d'amuri e puisia,
nun era la Traviata,
ma ti quariva 'u cori
'dda simplici sunata
chi facìanu i suori !
Tu scinni di li stiddi
oh re, o re du celu
cantanu i picciriddi
e' cincu sutt'o' gelu !
E 'nchiazza abbrazza e vasa
c'amuri e simpatia
e cu è c'arresta 'ncasa
lu fa pi malatia !
Passaru quarant'anni
ed è sempri Natali
la vera festa ranni,
ma ci vonnu i regali :
motori pi me' figghiu,
pilliccia a me' mugghieri,
i sordi 'unni li pigghiu ?
Matruzza chi pinseri !
L'organu cchiù nun sona,
lu coru cchiù nun canta;
'unn è 'dda genti bona
'unn è 'dda genti santa?
'A festa di Natali
tantu si trasfurmau
chi fera di regali
idda n'addivintau !
Cu vischi e cu spumanti
festeggianu 'u Bamminu,
ca mogghi e cu l'amanti
o' bancu di sciminu !
|
e-mail -
