MENU' A LA SICILIANA

Quannu arriva fumanti 'nan tuvagghia
bedda e fragranti 'dda pasta cu l'agghia
cu ' ddu gran ciaru di basiricò
s'arricria veramenti don Cocò !
D'antipastu iddu avia prima manciatu
e li baffi s'avia già pilliccatu,
quattr'alivi e tannicchia cipuddina
'na sarda e du' pizzudda di tunnina.
Pi sicunnu ci su' scurma lardiati
beddi a la piscatura priparati
e l'arruscia cu vinu di cantina
veru balsamu pi la panza china !
Pi dolci c'è cassata siciliana
e puru quarchi fruttu marturana,
pi frutta pigghia aranci e mandarina;
la megghiu qualità di li jardina,
finisci c'un bellissimu café
e saziu si sbuttuna lu gilé !
Cu la panzazza china abbuturatu
s'av'a pigghiari lu bicarbonatu.
E l'assessuri, lu 'ncigneri Brasi
p'addiggiriri : quattru biochetasi !
Vuci
Chi fici, si manciau quarchi cantuni ?
Pueta
Chiossai; si masticau mezzu comuni!