Jucava allecru focu focu 'nno caminu
e nni truvamu cu Lola vicinu;
iritu 'n mucca e manu supr'a coscia
mi pallava di l'ansia e di l'angoscia.
Jò ci taliava, a lumi di lu focu
chi 'ntrizzava 'dda notti stranu jocu,
l'oru di la piluria di la schina
e li minnuzzi nichi di bammina
e cu l'occhi nna l'occhi ci ricia:
tisoru meu l'angoscia è chidda mia
d'aviri a latu tutta sta biddizza
e nun ti pozzu fari 'na carizza !
M'abbrazza strittu e si nni scappa via
pi circarisi 'n'autra cumpagnia,
mentri chianu s'accosta la Giuliana
chi si nni stava sula, un po' luntana
s'assetta 'n miazza cavura chi scotta,
mi rici : Com'ha' a fari cu 'sta cotta
chi ti pigghiasti pi l'amica mia
chi vogghiu tantu bbeni com'a tia ?
Ci cuntu di Cupidu jocu e stori;
lu diu chi s'addiverti cu li cori
e' sangu ruci, mi la strinciu 'n pettu
chi lu me' cori è carricu d'affettu !
Nesciu fora, salutu li picciotti
a strinci e vasa : Amici bonanotti !
Mi vennu appressu Lola cu Giuliana;
nun mi taliati cu 'sta cera strana
e nun pinsati mali, cari amici,
si 'n tri facemu 'na coppia filici !
Un annu di 'sta vita e cu la banca
finìu ricoveratu a Turribianca !
|
e-mail -
