LACRIMI E VASUNA

Nni facìamu vita 'nno jardinu;
chi friscuri la gebbia di matinu !
Dopu manciari c'era 'u pervulatu
e dda tu mi ricivi: Ciatu, ciatu !
Jò t'ammitava rintra 'a pagghialora
e ti ricia a l'aricchia 'dda parola
e tu, russiannu timida: Chi ddici ? !
E dda rintra quant'eramu filici !
Ma poi c'eranu lacrimi e lamenti
chì li piccati vonnu pintimenti !
Quannu vinivi russa e stracanciata
pruvava 'n 'emozizoni prelibbata
a viriti di novu cota, cota,
ricennu: Sugnu cca l'urtima vota!
E, pallannu, chiancivi: Ciatu, ciatu,
ormai cchiù nun mi sarvu, m'hai dannatu !
Ma lu chiantu cchiù dduci fa l'amuri
e tu, bedda, chiancivi pi uri ed uri
e pi lu chiantu ti vinia la frevi
e ti ricia : funtana mia di Trevi!
E ti passava subbitu ogni cosa;
comu guarivi cu 'na frasi, Rosa!
Ed ora pi tannicchia colicisti
hai consultatu quattru specilisti !