Quannu chi Mira arriva 'nmezzu 'a chiazza,
'ncitrati e bruni li cosci e li vrazza,
cu li minni chi spunnanu 'a cammisa,
capiddi a cura nna la schina tisa,
ettanu smani puru li cchiù santi,
l'occhi cercanu 'ddi formi 'ncuetanti,
s'idda supra li tacchi si rimina
o si si movi l'anca culummina
ci spunta di lu spaccu di la gonna
la coscia liscia comu 'na culonna !
E si senti pirdutu Piu pir idda
di gran sururi 'a magghia si cci 'ncodda
cancia culuri; giannu, virdi e russu
e sutta sutta, si muzzlca 'u mussu
siddu si vota e la viri di schinu
resta sturdutu; chi gran mandulinu !
Si cala l'occhi chi peri divini
tennari e nuri rintra li tappini !
Si lu saluta cu 'ddu risolinu,
biancu smaltu tra labbra di carmìnu,
si senti mortu e fa 'na granni 'mprisa
p'un vasari la terra chi scapisa !
Ma quannu ch'idda passa cu lu zitu,
'dda pinnalenta di 'Ntoni Ferlitu,
tannu Piu si la pigghia cu li stiddi
e s'ascippasis tutti li capiddi !
Ma si carma cu lu proverbiu anticu
chi ci 'nsignava so' nannu di nicu :
li rinari ci l'hannu li spilorci,
nne megghiu fonti ci vivinu i porci !
|
e-mail -
