Tranquilla e lenta già cala la sira
e Polifemu 'n casa s'arritira
cu li cani chi satanu cuntenti
abbaiannucci all'ummiri di nenti,
quannu arriva filici a la so' tana
ci trova chi l'aspetta genti strana;
su' quattru greci lisci e profumati
comu li tappinari di li strati !
Si prisenta lu capu : Sugnu nuddu
e priari ti vulissi p'un pizzuddu ...
« Disponibili - rici Polifemu
assittativi cca chi vi sirvemu;
c'è ricotta, tumazzu e tumma frisca,
frutta tennara e carni di rinisca ! »
« E niautri ti purtamu vinu forti
pi putiri anurari la to' corti! »
S'assettanu e cumincia lu fìstinu
e 'dd'amici s'allitranu di vinu
e cuntanu lu fattu di la Circi
la maga chi canciau l'omini 'n porci,
stori li cchiù cunfusi e tanti 'mbrogghi
di li sireni buttani di scogghi;
cosi ch'addiggiriri nun si ponnu
ch'a Polifemu ci cala lu sonnu
e mentri chi durmia facciabbuccuni
si 'ntisi 'na manuzza 'nno vastuni !
E' lu grecu e ci rici : 'Un t'arrassari
chi l'amuri cu tia jò vogghiu fari !
Polifemu l'afferra pi lu pusu
ricennucci: «Vattinni gran garrusu ! »
Si vota e prontamenti s'addummisci,
ma lu grecu marvaggiu lu culpisci
cu lu lignu addumatu, lu finocchiu,
accussì forti chi ci annorva l'occhiu !
Lu restu di lu fattu ' u sannu tutti
comu lu grecu scappau di li rutti :
foru 'na mala chenca di finocchi
ch'o' sicilianu ci attupparu l'occhi
e di tannu l'avemu ancora chiusi
pi curpa di 'nnapocu di garrusi !
|
e-mail -
