Prima, quannu sintivi: L'Avvocatu!
Chiddu cu la gran facci 'i cufuruna
tuttu mirrinu e tuttu arrapacchiatu,
patruni e capu di l'autri patruna,
tu pinsavi : chi stili, chi sussiegu,
cu dd'erri muscia e l'abbitu gissatu
e 'dda taliata chi ddici : ma pregu !
Diu ! pinsavi : chi tipu ricercatu !
E ti tinivi a 'na granni distanza
comu si ti sintissi propriu nenti
di fronti a 'ssa grannissima 'mpurtanza
d'un pirsunaggiu pivveru 'mpunenti !
Ma doppu di lu scannalu Bombetti
appi di cojppu 'na rivelazzioni :
anchi li ricchi garbati e perfetti
quannu si tratta di speculazzioni :
di fari sordi, addiventanu jeni
e nno' vinniri l'armi a tutti quanti
'un c'è nudda murali chi li teni !
E si smovinu puru li cchiù santi;
propriu tutti li grossi 'ndustrialuna,
l'araldica di megghiu schifittusi !
Pi ccui li muralisti pulintuna
si fannu soci di li gran mafiusi !
Siccomu chi l'Orienti manna hascìsci
'nncanciu di bummi mitragli e cannuna
allura li 'ndustriali, si capisci,
si rivolginu a quattru lazzaruna
chi cci vinninu 'a robba 'n discrezzioni
e ci passanu ' sordi a li patruna
chi ci gnassanu cu li malazzioni;
tan tu ci riri ad iddi la furtuna !
Ma nna li beddi rivisti 'llustrati
fannu scriviri: Moralizzazzioni
contru la mafia ch'allorda li strati !
Abbinannu Sicilia e curruzioni
'ssi grannissimi porci debbusciati
nn'hannu 'nfangatu avennu l'illusioni
d'esorcizzari li granni piccati
chi fannu contru tutta la nazzioni !
|
e-mail -
