PRESENTAZZIONI
Cu tutti 'sti progressi e 'nnovazzioni
stamu pirdennu tanti tradizioni;
'na vota chi gran festa a Carnevali:
chi vuci, chi risa ti e granni sciali,
chi spassi chi baccanu pi la via,
passava ardita la cavalleria
e quanti assuciamenti e macarari
e vuci orripilanti di li mari!
E li mascari inchìanu li strati,
chi granni scaccaniari di risati !
Poi puntualmenti annunziatu di bannu
c'era lu tistamentu di lu nannu
e li pueti dicìanu li parti
a cunsunanti; grann'opiri d'arti !
E nuatri avemu 'sta bedd'ambizzioni;
rinnuvari 'sta granni tradizioni!
Attintati chi stamu cuminciannu
la vecchia bedda farsa di lu nannu !
* * *
NIPUTI
Nannu bellu, comu stati ?
Amu statu proccupati !
NANNU
'Sti duttura siciliani
sunnu armali e no cristiani;
pi 'na cisti di dui grammi
chi ci avia 'n mezzu li jammi
mi raperu tutt'a panza
dimustrannu 'na gnuranza
'na gnuranza cchiù putenti
di 'napocu di sturienti !
Nonostanti 'sta svintura,
procurata di duttura,
sugnu cà 'p'un sacru ritu,
prisintatimi lu zitu !
(al quale porge un regalo)
ZITU
Nannu caru, nannu bellu
ti ringraziu di l'anellu !
(Zitu esce)
NANNU
Matri mia 'stu me' niputi
comu palla cu 'sti sciuti
« Nannu caru, nannu bellu »
mi parissi 'ricchiuncellu !
NANNA
(entra toccandogli la fronte)
Comu stai, maritu meu ?
chi gran gioia, chi gran preu
provu a viriti guaritu
beddu prontu pi lu ritu !
NANNU
'Un putia certu sperari
ch'arrivava a maritari
a chist'urtima niputi
cu tanticchia di saluti;
certu fu gràzia di Diu
chi 'stu votu arrinisciu !
NANNA
(toccandogli la fronte)
Chi cci aviti nna 'sta frunti ?
C'esti un bozzu quant'un munti !
NANNU
Mogghi mia, chi mi tuccati ?
Sunnu posti dilicati
e si c'è protubiranza
esti vostra la curpanza !
NANNA
Chi dici ti sciaguratu ?
Jò firili v'haiu statu
anchi si provocazioni
e cchiù peggiu umiliazzioni
nni passai 'n'intera vita,
ma pinsamu pi la zita !
NANNU
Siti vui 'na santa donna
pura comu 'na Maronna
e cu riei lu cuntrariu
esti propriu strafalariu !
A propositu du bozzu
mi ricordu comu pozzu;
mi lu fici a lu spitali
chi pruvannu lu gran mali
mi sbatti' la testa a mmuru
jò sintennu dda' sulu !
(Trasi a Niputi e nesci 'a Nanna)
NIPUTI
Sta vinennu lu parrinu
priparati un ciascu 'i vinu,
iddu veni di dassutta
avirrà la vucca asciutta
sarà stancu di li missi
pi li suori e li badissi;
arricogghi puru cuti
p'addutari la niputi
chi si rici nne' curtigghia
certu chi cci veni figghia !
(Trasi lu Parrinu)
PARRlNU
Paci e bbeni a tutti quanti
cu la grazia di li santi !
(il nipote gli porge il fiasco)
Matrimoniu a dumiciliu
proibisci lu cunciliu,
ma putemu accummirari
cu 'na botta di rinari :
ottucentu e semu appostu
pi Gesù patruni nostru !
NANNU
Ottucentu accussì tanti ?
Fati offisa vui a li santi
PARRlNU
(Beve e beve)
E facemu setticentu
accussì siti cuntentu !
NANNU
(rivolto al nipote)
'N autru ciascu, me' niputi
s'u' sazziamu di vivuti
sparagnamu quarchi cosa !
Setticentu nun è cosa !
(arriva il nipote con altro vino)
NANNU
(offrendo)
Senza fari cumplimenti
dai, viviti chi si senti
chi muriti di la siti !
Cumplimenti nun faciti !
PARRlNU
(allunga la mano)
S'è pi farivi cuntenti
senza fari cumplimenti ...
NANNU
(senza porgere il fiasco)
Setticentu sunnu assai!
PARRlNU
Nannu chi diciti mai! ! ?
NANNU
Setticentu sunnu assai !
PARRlNU
(prende il fiasco e beve)
Cinqucentu e nn'accurdamu:
li picciotti maritamu !
NANNU
Cinqucentu e cussì sia
pi Gesù, Peppi e Maria!
(Nesci 'u parrinu, trasi 'a zita)
ZITA
Nannu meu, cchiù nun lu vogghiu !
Scappu 'ncammara e mi spogghiu!
NANNU
Figghia mia, soccu ti fici
chi ti viu 'cussì 'nfìlici ?
ZITA
'Stu rugnusu avi l'amanti!
NANNU
E ti pari ch'è 'mpurtanti ?
ZITA
Si ! l'amanti ch'avi chistu,
nannu meu s'unn 'u capistu,
è picciottu e no picciotta
mi nni vaiu sbattennu 'a porta!
NANNU
Dunqui è veru esti 'ricchiuni !
ma pirò chi picciuttuni
(gli fa il verso)
« Nannu caru, nannu bellu
vi ringrazio di l'anellu ! »
(cambia tono)
Ma chi bedda giuvintù,
ma cu la capisci cchiù ! ?
(Trasi lu zitu)
ZITU
Zita mia jò ti prumettu
chi mi levu 'stu difettu !
Pirò tu m'hai a giurari
chi finisci di sniffari !
NANNU
Soccu sentu 'sta matina !
Soccu sentu ! chi ruvina !
Un finocchiu e 'na drugata;
chi famigghia ruvinata !
ZITA
La sniffata nun è nenti,
oh grannissimu fitenti
chi m'arrizzanu li carni
a sapiri chi m'inganni
cu n'autr'omu comu a ttia;
mi fai veniri 'a pazzia !
ZITU
Ch'un lu prova nun ci criri
esti n'autru lu piaciri
chi ti duna l'omosessu !
chi ti renni com'ossessu !
Ma p'u bbeni chi ti vogghiu
ora cchiù nun lu farrògghiu
e ritornu a lu normali
chi guarivi d'ogni mali
e cu 'st'àidis ch'ora c'è
m'ha' vardari jò virè !
ZITA
E jò lassu la sniffata
ora chi mi sentu amata!
NANNU
Finarmenti v'accurdastu
e filici riturnastu !
Forza a li priparativi,
Diu putenti, alliviscivi !
(Si prepara il rito)
(Trasi lu Parrinu e gli altri)
PARRlNU
E tu Lisa si cuntenti
di pigghiari 'mmatrimoniu
a Pippinu cca prisenti
puru senza patrimoniu ?
LISA
Si, Parrinu mi lu pigghiu
datu ch'esti un bravu figghiu !
PARRlNU
Tu, Pippinu si cuntenti
di spusari 'sta picciotta
anchi siddu 'un porta nenti ?
Dai rispunnimi a la botta !
PIPPINU
Si, Parrinu, cuntintuni
cu lu cori e la raggiuni !
PARRlNU
E scanciativi l'aneddi;
prestu, prestu, figghi beddi
ch'aiu prontu un funerali
tra mezz'ura 'n cattedrali !
(Si scambiano gli anelli, si baciano; il nanno sviene)
NANNA
Prestu, prestu 'a dottoressa
chi cci porta la cumpressa
cca pi fallu rinviniri
si no mali pò finiri !
(Trasi 'a dottoressa cu lu 'nfirmeri)
DOTTORESSA
Vegnu prestu, sugnu lesta
e mi perdu pur'a festa
pi curari cca lu nannu
e guarillu di l'affannu !
Upiràmu 'u vicchiareddu
tu, 'nfirmeri, lu cuteddu !
(le porge un coltellaccio)
Matri mia, chi gran svintura;
la firita cci suppura!
Soccu nesci di 'sta panza;
setti chila di sustanza !
Cci lassaru nne vuredda
'na grannisisma paredda;
lu riloggiu du dutturi
chi funziona e signa l'uri !
E picchissu stava mali
di quann'era a lu spitali,
stava mali 'u vicchiareddu
cci attuppava lu vureddu !
Matri mia chi c'esti ancora?
C'è l'occhiali di la suora,
la parrucca du primariu
e l'aneddu du vicariu !
Nannu beddu la to' panza
la scanciaru pi 'na stanza
o p 'un granni malasenu
dunni mèttinu lu fenu !
'Sti rugnusi du Spitali
cci lassaru dui chintali
cca di mattula e di fìlu
e t'innivi a lu suppilu !
NANNU
(si alza)
Dottoressa arricialai
chi gran pisu mi livai
ora sugnu cchiù cuntentu
pozzu fari tistamentu !
(Trasi lu Nutaru)
NUTARU
E jò sugnu lu nutaru;
li scritturi jò priparu
sia li pubblici e privati
l'impurtanti è chi pacati !
Tistamentu a domiciliu
e di sordi un tirribbiliu:
tri miliuna senza tassi.
NANNU
Ci livati 'u sancu e' scarsi
NUTARU
Nannu meu, scarsu nun siti
vui li picciuli l'aviti !
NANNU
Ma nun ti li rugnu a tia
pi la to' calligrafia!
NUTARU
Ma pi vui fazzu eccezzioni
chi vifazzu 'a rituzzioni !
NANNU
L'arma a Diu, lu feu a cu tocca
mi ricìa me' nanna Rocca !
Dunqui a nui cari picciotti,
cca sintitivi 'sti botti :
'A bonarma di me' patri,
'a bonarma di me' matri
mi lassaru rera ricca,
ma pi vui c'è robba picca
chi napocu é puticata
e lu restu 'ntussicata.
Chi vuliti Cernobbilli
nun fu locu di birilli !
Anchi l'acqua di surgiva
esti anticchia radiuattiva !
E lu feu chi jò vi lassu
tra Marsala e Satagnassu
ch'è vicinu all'arioportu
(vi lu ricu cu scunfortu)
è 'nquinatu di lu scusciu
chi jò cchiù nun lu canusciu;
l'erva sicca, mori 'a vigna
è riduttu ch'è 'na tigna !
Lu zibbibbu a Lampidusa,
pi li basi di li U.S.A.,
è suggetta e' motoscafi
di marìnis di Gheddafi !
P'a cantina di li sciari
c'è lu pizzu di pacari.
La ricota di Giacanti
si la futti 'u suprastanti,
puru chidda di Vigneri
si la mancia lu camperi.
E lu fruttu di Fascatula
si lu pigghia la curatula;
mischinedda fu l'amanti
di don Cola lu briganti !
Lu cuntanti mi spariu
p'u siquestru di me' ziu:
un miliardu mi custau
menu mali chi campau !
Si nn'avissi a ricurdari
quarchi cosa avi a lassari !
Pi l'affittu chi nni paca
lu cumuni di Cunsaca
du palazzu di l'uffici
s'hannu a fari sacrifici;
la tangenti all'assessuri
sei miliuna su' sicuri!
E manteniri nni tocca
li mafiusi di la Rocca
Puru chiddi di Chiggiari
vonnu viviri e manciari !
Ma, picciotti, 'un vi scantati
chi la vera riritati
esti fatta di li quatri
e difisa di li latri
lu picchi la so' 'mpurtanza
nun capisci la 'gnuranza
di don Petru lu mafiusu
e pirciò nun nn'è disiusu !
Nni vinniti unu ogni tantu
e campati senza scantu;
l'antiquariu don Saroru
vi li paca a pisu d'oru !
Mi riciti: ma chi lassi?
Siddu tra mafiusi e tassi
picca o nenti a vui v'arresta,
accussì finiu la festa?
Chiss'è l'ebbica, picciotti,
fa cchiù scuru 'i mezzanotti !
Li patrizzi di 'na vota
a lu tempu da ricota
si pigghiavanu i tri quarti;
n'arrubbaru prestu l'arti
li mafiusi e li burgisi:
la ruvina du paìsi !
C'è 'na cosa chi v'a ddiri
anchi si nuddu mi chiri :
cu ricivi gran ricchizzi
si manteni nna li vizzi
ed è chinu di rimorsi
e picchissu pensa, forsi,
ch'esti robba 'mmiritata
e pirciò va scialacquata !
(Irrompe il cognato Luviggi)
LUVIGGI
Altolà ! 'stu gran birbanti
ci lassau tuttu all'amanti
'dda grannissima ruffiana
di Loretta, la romana
cu la quali ci avi un figghiu
e picchissu jò m'a pigghiu;
ch'unn è giustu, nannu meu,
chi cci lassi 'ddu gran feu
di la Banca Finanziaria
a 'dda granni strafalaria !
NANNU
Vui carmativi Luviggi
si farrà tuttu pi liggi !
L'usufruttu a me' mugghieri
di lu feu di li Vigneri.
A li quattru me' niputi
la mità, nun si discuti,
di la massa di li beni;
esti giustu e vi cummeni,
a me' figghiu l'interdettu
jò cci lassu nettu, nettu
l'usufruttu di tunnari
chi cci abbasta pi campari !
A me' figghiu naturali
'un vi la pigghiati a mali;
li me' tituli azzionari
e la quota di la Scari !
(tutti applaudono)
NANNU
Doppu chiddu materiali
eccu cca chiddu murali:
Jò vi lassu un munnu 'mpaci
dunni lu cannuni taci
chi l'orienti e l'occidenti
s'abbrazzaru risolenti
ed ognunu misi 'nvista
lu travagghiu du dentista :
renti beddi e livigati
com'i fa Cicciudagati
E tra russi e 'miricani
già sciarriati com'e cani
ora c'esti 'n'armunia
chi mai nuddu cci criria !
Ma 'ddu vecchiu Komeini
si sciarria cu li vicini
abbruciannu varchi e navi
comu li so' nanni vavi.
Musulmani, ma Sunniti
sempri con tra 'i Safarditi !
'n Nicaragua e 'n Salvadori
puru dda c'esti cu mori !
Nno paìsi di jurei
tra li genti galilei
tutti populi semiti
puru dda cci sunnu liti:
Arafatti cu murriuni
fa sparari lu trummuni
e Sciamir pi rapprisaglia
fa sparari la mitraglia
e 'sta storia mai finisci
fa cchiù fetu di li pisci,
di li pisci du muntisi
chi piscau ch'avi tri misi!
Poi vi lassu tantu spasciu
la cità 'n mezzu lu 'ngrasciu
e senz'acqua ormai riddutta
picchi su' malacunnutta
tanti e tanti cunsigghieri
ch'amministranu ki peri
o su' fissa o su' 'ncapaci
o chi vonnu stari 'mpaci
e comunqui 'sta citati
avi lordi li so' strati,
avi asciutti li so' tanghi,
li tubbazza fanghi fanghi,
lu travagghiu poi nn'ammanca
e la genti nn'esti stanca!
Italianu dormi e sbafì
senza scantu di Gheddafì
ma cusà, quarchi matina
'na gran flotta beduina
sbarchirrà nne' nostri porti
procurannu straggi e morti !
NIPUTI
N annu meu soccu riciti ?
Nannu meu nun li viriti ?
Eggizziani, tunnisini,
algerini e marocchini
anchi si jettanu vuci
si li mancianu li puci !
Vennu cca a frotti e sciami
vennu spinti di la fami !
Nannu meu l'unichi flotti
di 'nnimici su' li jotti
di li granni piscicani
e su' tutti d'italiani:
di nutara, di 'ncigneri,
farmacisti e parrucchieri,
debbutati e senatura,
commercianti, appartatura
e c'è poi quarchi 'ntustriali
chinu sulu di cammiali !
(Trasi lu parrinu)
PARRlNU
Nannu meu; arma e curaggiu !
NANNU
Dopu Aprili veni Maggiu !
PARRlNU
Mentri fai l'urtimi passi;
a la chiesa chi cci lassi ?
NANNU
Jà ci lassu 'nrirità
la gran fìri e la buntà !
PARRlNU
E di casi beddi rassi
a la Chiesa chi cd lassi ?
NANNU
Pi la chiesa li ricchizzi
sunnu tanti dibbulizzi
lu ricìa puro me' pa'
chi la chiesa è puvirtà !
PARRlNU
Vi vuliti cunfìssari ?
L'ogghiu santu v'haiu a ddari ?
NANNU
Già lu fìci a lu spitali
quannu chi mi 'ntisi mali
e di certu jò d'allura
nun sbagliai ma li duttura
iddi si ch'hannu sbagliatu
iddi l'hannu lu piccatu !
FINIU
torna sopra
|
e-mail -
