C A R N E V A L I     1 9 8 7
TISTAMENTU DI LU NANNU

Mi nni vaiu veru cuntenti
senza lacrimi e lamenti
megghiu mettisi di latu
chi campari dispiratu
cu 'stu munnu stracanciatu
tuttu scusciu ed inquinatu
cu 'sti missili nall'aria
cu 'sti facci di malaria!
'Ntistamentu jò vi lassu
la balanza e lu cumpassu
pi putiri misurari
tutti cosi di manciari
chi m'aspettu tempi brutti
scarsi d'arvuli e di frutti
scarsi puru di farina
chini sulu di ruvina
d'attentati e d'assassini
chi nun ponnu aviri fini !
Li 'ngiustizzi e li miseri
sunnu tanti e cussì seri
ch'un si ponnu sraricari
ki tinagghi li cchiù rari
e cu rici d'ascippalli
sunnu poi li cchiù sciacalli
e li linqui su' cunfusi;
c'è cu conza e c'è cu scusi
e tra cusiri e scirari
nun putemu mai cunzari
c'è cu rinchi e cu sdivaca
cu travagghia e cu s'annaca
e 'dda pocu genti onesta
nun ci ponnu dari 'questa
a li troppi dilinquenti
di li cincu cuntinenti !