C A R N E V A L I     1 9 8 8
LU TISTAMENTU DI LU NANNU

S'avvicina lu mumentu
ch'haiu a fari tistamentu
di li beni chi pusseru:
assaliddu a diri 'u veru !
Jò ci lassu a me' mugghieri
chi si leva lu pinseri
di cummattiri cu mia:
libbirtà e fantasia !
Si si sapi riminari
'n autru fìssa 'u po' truvari !
A me. figghiu lu dutturi
anchi s'un m'ha dato curi
jò ci lassu l'assistuti
tutti chini di saluti
accussìni s'arricria
e nun sbaglia malattia
comu già fici cu mia,
cu so' soru e cu so' zia
chi cci morsi mischinedda
propriu sutta li cutedda !
A me' figghiu l'avvocatu
chi li sordi m'ha manciatu
pi li mali so' difisi
jò ci lassu i ginsi smisi,
cu li causi ch'ha persu
cu 'ssi ginsi jò l'abbessu
chì si nno m'arresta nuru
'stu me' figghiu, di sicuru !
A me' figghiu lu 'ncigneri
jò ci lassu li pileri
tutti beddi calculati
chi li soi sunnu sbagliati,
poi tannicchia 'bbusivismu
e macari quarchi sismu
accussini s'arricchisci
e la tomba mi finisci !
A me' figghiu farmacista,
chiddu ch'avi picca vista,
e, scanciannu lu clorulu
c'un prodottu assai cchiù scuru,
'ntussicau la za Titì
e 'ncalera mi fini
jò ci lassu la putia
propriu all'anculu da via
e nun cancia posizzioni,
si nun soffri d'ambizzioni,
chi putiaru lauriatu
lu spizziali è calculatu !
A me' figghiu debbutatu
ch'esti sempri 'nchiffaratu
jò ci lassu 'u ristoranti
accussini, lu birbanti,
si cci veni di manciati
'n casa sua si po' sazziari !
A me' fìgghiu lu parrinu
jò ci lassu tantu vinu;
cu la chiesa ch'è vacanti
senti friddu cu li santi,
accussini si quaria
e la so' malincunia
si la scorda p'un momentu
'n mezzu di lu Saramentu !
Poi a Ronald e a Micheli
jò ci lassu tantu meli
accussì li so' paroli
sunnu ruci com'i voli
tutt'u munnu ch'è scantatu
di l'anticu tintu statu !
A lu vecchiu Komeìni
ch'è sciarriatu cu i vicini
jò ci fazzu diri missi
affinché si cummincissi
di fìnilla cu la verra
e lassari 'mpaci 'a terra!
Di Sciamirri lu jureu
jò di certu 'un mi nni preu
chì li genti d'Arafatti
com'armali li combatti!
Cosi tinti v'haiu a ddiri
anchi si quarcunu riri :
li siringhi di drogati
sunnu 'n terra strati, strati,
di siquestri e di rapini
li giurnali sunnu chini !
Ma fìnemula picciotti,
nun schirzamu cu la morti !
Vi lu rici un cumpetenti
chi di morti si nni 'ntendi !
E lu ciatu già m'ammanca
e la vuci si fa stanca,
la cannila s'astutau
la vicchiazza mi chiamau !