L'acqua, nnu dissi lu vecchi Taleti
duna la vita, senz'acqua si feti;
diciticcillu a certi deputati
testi vacanti e panzazzi parati
chi la Sicilia la vonnu assitari
mentri 'i surgiva si perdinu a mari !
Fu dittu: Veni Nunziu e l'acqua trasi
ma l'acqua scumpariu doppu di Nasi!
Vennu Pizzu, Pirricuni e Parrinu
e l'acqua manca puru nno catinu !
Ma Pirricuni appena s'arruspigghia
si fa lu bagnu cu latti e canigghia;
avi trent'anni chi fannu 'sta cura
iddu e la so' bellissima signura !
E la Parrinu surura ni 'ecca
pirò si lava cu latti di scecca
comu ch'usava la bella Poppea
e si ni futti da genti plebea!
E' sempri assai pulitu Ciccialagna,
ma chi ci metti nna vasca ? Sciampagna ? !
Culicchia nna lu Belici si sciacqua;
avi trentanni chi c'inquina l'acqua.
E certamenti Massiminu Grillu
si fa lu bagnu cu l'acqua Pozzillu !
O' Locuranni, poi, Cicciucaninu
si fa li bagni cu lu megghiu vinu !
Cristardu, comu dissi Zaraustra,
doppu lavatu, cu l'ogghiu s'allustra !
Vizzini cu Laporta; proletari
si cuntentanu di l'acqua di mari !
Si lava 'i peri Pizzu nno gibbiuni
e ci l'aasciuca poi Cicciuliuni !
E Costa nna li Bbeni culturali
si fici i bagni e guariu d'ogni mali !
Li deputati burgisi o cumpagni
sempri si fannu li cchiù beddi bagni
e ni lassanu nna la tristi sorti
d'aspittari, si veni, l'autobbotti !
|
e-mail -
