Nuatri semu i mascarati
chi vuciamu strati, strati;
picciutteddi 'un vi scantati
di 'sti facci cummigghiati
ch'un vinemu a fari dannu
ma su' l'autri chi lu fannu
chi la cera di l'ingannu
si la tennu tuttu l'annu !
Abballati, dai abballati
comu niatri mascarati
chi stasira mori 'u nannu
e li festi si nni vannu !
Picdriddi 'un vi scantati
si sputtemu i debbutati,
si sputtemu i senatura
chi nni fannu una l'ura
e lu sinnacu lu stessu
ch'è pur'iddu cumprumessu
nna li magghi du putiri
dunni trova lu piaciri
chi cci piaci cumannari
e l'usceri fa trimari !
E nna circa vinti misi
sta 'nnigghiannu lu paisi
di riscursa e di paroli
pi so' scopi e li so' glori,
ma jò fatti nun ni viu
e lu rici puru me' ziu
chi cci rettiru 'a pinsioni
senza cauci né gnizzioni
e si vui nun ci cririti
siti propriu scimuniti;
iddu ci avi settant'anni
e li marchi di trentanni,
un parenti senaturi,
lu niputi ch'è dutturi
e 'na fìgghia maritata
cu lu principi Balata!
'Un si sarva propriu nuddu
e picchissu jò cafuddu,
ma su' vuci contraventu,
ma lu stessu 'un mi nni pentu
tantu pallu pi sfogari
e lassatimi pallari
e lassatimi cantari !
|
e-mail -
