NATALI LUNTANU DI LA CASA

Scinneru ddi Calabri zampugnari
sunannu nne strati, la nuvena;
pi cu teni luntanu li sò cari
purtava ntra lu pettu granni pena.

Lu marinaru ch’è mmarcatu fora
festa nun prova e scuntentu vivi,
struri la menti pinsannu a la dimora
pigghia la carta e cu lu cori scrivi:

Cari figghi, è lu primu Natali
chi passu luntanu di la casa,
vurrissi essiri aceddu, e aviri l’ali
e mezzu di viautri fari vasa.

A tavula mittiti a lu me postu
la seggia me’ acciancu a Carmilina;
e mettiti se’ piatta a lu mè postu
comu si fussi ddocu a la marina.

Sulu accussì lu cori m’arriciala
attornu a dda seggia facennu ala.