MULINU ABBANNUNATU

Supra un timpuni a centru situatu
pari un camperi chi vardi la campagna
comu un munneddu tuttu spirtusatu
sutta lu suli e l’acqua chi ti vagna.

Canzuni beddi nni cantasti tanti
cu dda gran margherita ntra la testa
aiutatu di lu Signuri e di li Santi
all’alba cuminciava la tò festa.

Stu fattu pari comu fussi aeri,
davi tantu caluri a li famigghi,
inchivi li maiddi e i tavuleri
e sanu nutricavanu li figghi.

Picciottu macinasti oriu e furmentu
e ora vecchiu pati li tò peni,
ti misuru un gaddu comu argentu
pi viriri lu ventu dunni veni.