S’ARRUSPIGGHIAVA TRAPANI D’ACCUSSI’

Ddu vaneddi prima di la marina
quasi a mità di strata
tinia putìa donna Vicinzina
e la matina stava ntraficata,
li bivanti càvuri priparava,
li cucia a carvuni o cu li ligna,
cu la tazza tuttu misurava,
vinnia latti e puru la gramigna.
San Petru già si sintìa sunari:
Susitivi vecchi e picciutteddi,
lu cafitteri si sintia abbanniari
firriannu stratuzzi e vaneddi;
l’aggenti affacciavanu mpiruni
pi pigghiarisi a tazza di cafè:
lu tiniva dintra lu caffittuni
e abbanniava: Cavuru cavuru è.
Fattu di cicoria e orzu atturratu
era veru spicialì di sapuri
tuttu cu lu zuccaru
cunzatu paria veru cafè di lu culuri.
Trapani s’arruspigghiava la matina
cu lu cafè di donna Vicinzina.