|
Sutta stu celu tutto nfiliniatu
nuddu cc’è cchiù chi scupa li iurnati;
l’arvulu chi vitti Giura mpiccatu
parla di ddi tristi tempi passati.
A lu Calvariu cumpari la Gran Cruci
chi Gesù si purtau ntra lu coddu,
ancora si sentinu chianti e vuci
e lu luntanu cantu di lu ´addu.
Ogn’annu a Pasqua veni ricurdatu
cu longhi tavulati e sacramenti;
stu sacrificiu sò nun è ricumipinzatu,
restanu nchesa friddi munumenti.
Paremu surci sciuti di li tani
e ntrappulati ntra limuna e cardi,
nni mangiamu tutti comu li cani:
cunta sulu u valuri di li sordi.
Quannu viremu a lu pittirrussu
chi di ddu sangu n’arristau ntaccatu
lavamu la cuscienza a santu cursu
picchì u munnu è ghiuntu scilliratu.
Scippamuni lu cori di lu pettu
e dàmulu cu gioia a lu Signuri,
curcamunillu nta lu nostru lettu
a stu Maestru di lu granni amuri.
A lu matinu viremu la sò luci,
quariamuni lu cori nta sò braci,
facemuni lu signu di la cruci:
sulu accussì si pò truvari paci.
|
e-mail -