SULI D’ESTATE

Prestu lassi lu lettu la matina
e subbitu ti metti a travagghiari,
pi prima cosa asciughi l’accquazzina
poi suchi l’acqua di lu mari.

Pi dari vita a l’omu e la natura
e rricriari tuttu lu criatu,
d’estate duni càvuru e lustrura
e di mmernu sì tantu addisiatu.

La sira, all’addumari di lampiuna
nfina chi ti nni vai, letu saluti,
non viri e sviri arriva a bella luna,
idda ni rici: ussu, tutti muti!

La terra a ttia pi cantari
Torna ogni jornu pi leti campari.