ALL’AGGHIURNARI

Ogn’annu Marzu sona na gran trumma
p’arruspigghiari tutti li ciuriddi,
la terra cosi rari prestu sbumma,
leti currinu fora i picciriddi.

Vennu l’erva, lu maiu, runzi e spini,
lu suli beddu nasci cu primura,
ciuri di campu, furmentu e paparini
mi parinu capricciu di natura.

La pecura si stenni la sò lana,
l’aceddu canta vola e sataria,
a lu toccu di l’ultima campana
lu viddanu è ancora a la campìa.

Lu ventu cu lu sò tepidu ciatu
a li muntagni leva lu cappeddu,
nall’arvuli lu niru è già cunzatu,
ncelu la luna joca ammucciareddu.

Si senti un’aria duci e profumata,
la rundini cuntenta chi firria,
si fa cchiu curtulidda la nuttata,
la Pasqua già a la porta tuppulia.

Luci lu mari, nenia è lu sò cantu,
li pisci su’ pronti p’abballari,
lu piscaturi nesci senza scantu,
la rizza veni china all’assummari.

Nta dd’acqua chiara, chiara di la chiusa,
ogni pueta a scriviri è mmitatu
e aiutatu di la sò cara Musa
discrivi sta gran festa di Criatu.