IU EMIGRARI?

S’avissi lu bisognu d’emigrari
sulu a pinzari mi sentu affucari;
iu cca nascivu e cca mi vogghiu stari
puru s’unnàiu pani pi manciari.
Sta terra nostra bedda, tutta nciuri,
puru si unu è addiunu fa campari,
si sazia di l’oduri di li ciuri
e di ddu beddu sciauru di mari.

Semu atturniati di li gran frutturi
chi pussiremu nterra e puru a mari,
si senti lu cantu di lu piscaturi
quannu chi parti pi gghiri a piscari.
Si senti lu cantu di lu zappaturi
chi prea a lu Signuri pi manciari;
stu cantu di lu cori ’un si cancella;
fora lu megghiu pani è comu fella.

Ci su’ tanti dda isuli mmezzu o mari,
spittaculu divinu di taliari,
sta terra a visitarla a tutti mmita
e n’attira tanti comu calamita.
Luntanu di sta terra ‘un si pò stari
ma lu patri c’avi figghi a mantiniri,
e lu riccu a li so spaddi va a ngrassari,
cu tantu beni ci attocca d’emigrari.

Si iu pinsassi di lassari a tutti
subbitu finissi di campari,
tutti l’affetti mi fussiru strutti
ntra na stanza mi chiurissi pi moriri.
Sugnu regina tra li me miseri
megghiu campari tra fami e prieri.