Chi sensu avi
'stu Natali chi torna
pi li trazzeri di lu munnu
quannu la porta di la paci
resta quasi sempri allapazzata,
chiusa a la spiranza di la genti.
Chi sensu avi
'stu curriri fistusu versu vitrini aperti,
tutti vistuti a festa,
quannu li me pinseri abituati
a la bunazza,
sunnu sbattuti sempri scogghi scogghi.
Comu 'n-agnidduzzu spersu, senza matri,
mi si strinci lu cori
quannu l'urtimi sfilazzi di suli
astutatnu lu jornu.
E allura,
menzu allampanatu e carricu di silenziu,
vaju tampasiannu pi li vaneddi
aspittannu a vrazza aperti la nascita
di lu Bammineddu,
cu la spiranza di vidiri jorna
figghiari sulu paci,
spiranza, c'aju cuvatu sira pi sira
sutta la cinniri di li me' prjieri.
Livatimi st'ummira di nuvuli
avanti a l'occhi mei,
lassatimi 'mmenzu a trazzeri di suli
unni suspira di menta e di jinestra
stasira alimentanu
sonu di campani e ciarameddi
e facitimi sčntiri passi di ventu
scapisari timpuna di spiranza
unni l'aria tra spini e ruvetti,
svampa faģddi
di PACI!
declama: Mario Barone
Autore: Franco Tripi
|
|
e-mail -
redazione@trapaninostra.it
