Mi ricordu quann'era picciutteddu
'na vota mi purtavi a lu casteddu,
trimannu tuttu pi la gran 'mprudenza
la me' cumpagna: Balistreri Renza,
russu suratu, chinu d'emozioni
mi la vasava foddi di passioni,
doppu, carmi, ni misimu a pallari
di la filicità chi da' l'amari,
a tarda sira, doppu lu dilettu
s'aggiustau tutta e niscemu a bbraccettu !
Li gran sdisanurati di picciotti
chi jucavanu cu mmia jornu e notti
s'u 'mmagginaru e mi tininru li passi
ed ammucciati vittiru li spassi
un jornu chi passava 'm bicicletta
pi la strata chi porta a me' villetta
iddi chi dda spilavanu l'alivi
mi risisru cantannu : Chi facivi
Turiddu a lu casteddu cu 'dda bruna
ammucciatu darré di li cantuna ?
Russiannu tuttu pi la gran vivogna
lestu mi nni scappai pi la campagna !
Ora chi la me' facci è fatta tosta
e ci sapissi rari la risposta
nun c'è 'na bruna chi ddici a Turiddu :
Mi cci porti stasira a lu casteddu ! ?
|
e-mail -
