Vitinu va d'appressu a un debbutatu,
nun l'haiu vistu, mi l'annu cuntatu,
com'addevu darreri la jmenta
ad ogni cugnintura si prisenta;
dopu 'u cumiziu 'a manu ci va strinci,
ricennu: 'A so' parola mi cumminci,
chi bedda linqua, chi bedda Rammatica !
- E canciannu riscursu -: La me' pratica ?
Sapi Ccillenza lu me' diretturi
si misi 'ntesta ch'ha' fari setturi,
jò li facissi, ma l'elettoratu
vol'essiri assistitu cultivatu,
mi capissi Ccillenza lu partitu ...
« Allegro don Vitino è già servitu ! »
« Grazzi Ccillenza, grazzi assai di cori,
sinceramenti nun ci cuntu stori ! »
All'ufficiu Vitinu cchiù nun torna
dunni ci ha gghiutu appena vinti jorna :
un misi di cunceru; l'urdinariu
ci spetta, l'autru di straordinariu
ch'è 'nvalitu ci attocca di dirittu,
e tri di malatia ch'è sempri afflittu !
Poi tra distacchi, cumanni e missioni
la so' vita la passa 'n gran tensioni;
'nfattariatu di sira e di matina
iddu sempri si sposta e si rimina
e s'affanna chi pari un disperatu :
quanti surura pi stari 'mboscatu !
|
e-mail -
