PUTIRI MALATU

O' votu comunali
chi fattu 'ccezzionali;
si portanu i duttura
p'aviri datu cura
a' genti di Paceca
chi sofferenti ed egra
'u votu ti prometti
sulu pi li ricetti,
pi tantu idda si sposta
p'a pinnula e 'a supposta!
'Na massa di malati
chi gira pi li strati,
'na muta maggiuranza
di frarici di panza,
'na schiera cupa e mesta
chi patinu di testa !
E nnui chi semu bboni
senza flebbu e gnizzioni
semu 'na minuranza
chi smessi e nun avanza
e, tra tanti malati,
semu l'emarginati !