ZIKIKI

Quannu scinni di l'aériu
'un mi pari nenti seriu,
ma mi pari Wanda Osiri
comu vasa e comu riri !
E li bianchi so' capiddi
chi ci arrivanu a l'asciddi
a lu ventu su' ghittati;
eccu 'u diu di li scienziati !
A taliallu ti sbiddichi
di lu ririri: è Zikiki !
Iddu trasi spissu 'n chiesa
sempri sutt'a cinepresa,
ma chi c'entra 'u neutruni
cu 'stu fari bacchittuni ?
L'atraéri 'n Vaticanu
iddu ci vasau la manu
a lu papa; a 'ssu polaccu
ci vasassi punta e taccu,
lu scienziatu vasapili,
omu propriu senza stili !
A Giordanu si scurdau
chi la chiesa l'abbruciau
e puranchi a Galileu
a cui mai fici gran peu ?
Comu mai sulu a Zikiki
ci dimostra ceri amichi?
O lu cleru esti canciatu
o Zikiki 'unn è scienziatu !
E lu Nòbel ch'iddu cerca
è sicuru chi l'avrà
certu no pi la ricerca
ma pi la gran vanità!