BIOTECNOLOGIE

Cu 'sta nova Biologia
si scatina 'a fantasia
e ti fannu 'a vaccaredda
ch'è cchiù nica di 'n'agnedda
è di moda e si l'accatta
già lu snòbbi ad usu d'atta,
si la metti 'nno salottu
e la munci sempri all'ottu.
Lu viddanu avia 'a crapuzza
e facia cchiù picca puzza !
E 'mprinaru 'a scimpanzè
ca simenza di Fefè:
chi nni nasci; 'na scimilla
o puranchi 'na gurilla ?
E dunn'è la novità?
Già n'avemu 'n quantità:
ci nni sunnu strati, strati
a miliuna, depilati !
Fannu 'n vitru genti nani
nov'unnè; c'è già Fanfani !
Vurpi ed omu soccu veni ?
Andreotti; nun cummeni !
Tra balena e voi marinu,
risurtatu: Spatolinu!
Tra garofanu e cannella
nni nasciu Marcu Pannella !
... E tra lupu e tardarita
appi a nasciri De Mita !
Ora pensu chi v'abbasta
si nno fazzu 'na catasta
Mi scurdai propriu di Natta;
'ncrociu fu di merlu e gatta!
Prima e doppu Garibardi
ci hannu statu li bastardi!
E la nova biologia
è 'na granni fìssaria !