Diu ! chi mali chi mi sentu;
megghiu fazzu tistamentu !
« Cicciu, chiama lu nutaru
accussini mi priparu
a lu viaggiu ch'haiu a fari
chi finiu lu carnevali !
A Dimitu l'irpinotu
jò ci lassu un tirrimotu;
chi cu nasci furtunatu
anchi s'è terremotatu
sempri bona ci finisci;
puru tannu s'arricchisci !
Accussi cuntentu puru
Muntanellu, di sicuru,
chi ci fa poi la murali
nna lu fogghiu du Giurnali,
dunni nun finisci mai
d'attaccari l'operai
speci si meridiunali
e difenni li 'ntustriali !
Ci ricissi: spilacchiatu
picch'un tocchi all'avvocatu
lu 'ncigneri e 'u contadinu
cchiù rapaci di l'irpinu ! ?
No ! pi tia ponnu arrubbari
sulamenti li 'ntustriali !
Jò ci lassu ad Andreotti
'na poltrona sulamenti
ma ca spina e la correnti !
E ci lassu poi a Bittinu
li stivali e lu frustinu
pi putiri fustigari
fumatura spinellari
e bucati - spacciatura
pi poi faricci la cura !
Tanti voti poi ci lassu
jò pi faricci 'u surpassu
o' Picci nell'elezioni
ma finiri opposizioni
e viremu s'iddu dura
cchiù di 'na legislatura!
Chi si senti patreternu
sulu quannu esti o' guvernu !
A d'Amatu, chiddu beddu,
propriu comu un succiteddu
ch'è ministru du Trisoru
jò ci lassu pumaroru
e patati e puma 'nfacci
e napocu d'ova marci;
a 'ssu fintu sucialista
oramai tuttu arrivista
chi ci duna siringati
sulu a chiddi spidduzziati
e a li ricchi lu cundonu
picchì ci avi 'u cori bonu
ed è sulu tolleranti
cu marpiuna e commercianti !
A Donatu lu Gattinu
lu ministru du chininu
di spitali e 'mbulatori
di li merici e li sori
jò ci lassu tanta stuppa
accussì s'attuppa 'a vucca !
A Jasseru l'Arafatti
chi pu populu si batti
jò ci lassu 'na nazioni
chi facissi bonazioni !
Ed a Regan ch'è 'mpinsioni
e talia 'a televisioni
lu programma chi ci piaci
ch'esti chiddu di la paci
e poi pensa o' Cremilinu
e si scaccia un pisulinu,
jò ci lassu tanta gloria
nna li pagini da storia
picchì si scurdau di Rambu
e la paci fici a lampu !
E' politici locali
chi nun vogghiu troppu mali
jò ci lassu la cicoria
chi rinforza la mimoria
accussì ricorderannu
li prumessi chi ni fannu !
E ci lassu a la Parrinu
ch'avi prontu 'u risolinu
un decretu di firmari
pi putiri accuminciari
a Segesta e Selinunti
comu puru supr'o Munti
la campagna di li scavi
pi mustrari ch'idda ci avi
interessi e cumprinsioni
pi la nostra depressioni
e si dopu ci la fà
anchi all'università
si putissi 'nteressari
ch'è 'na cosa di pinsari !
A Caninu entr'u Novanta
jò ci lassu Casasanta
ma cu Nubia nun schirzassi
chi si poi jò mi 'ncazzassi
comu ficiru i Romani
ci mannassi 'u boiacani !
|
e-mail -
