CH'E' VALENTI BUFALlNU

Ch'è valenti Bufalinu;
scrivi ogni annu un libbriccinu,
cuminciau a sessantanni
quannu ch'iddu era già ranni
cu 'na certa « Diceria»
e pallau di malattia
e di tanti vecchi cosi
fruttu di la so' sclerosi!
Poi nni fici sbiddicari
ch'a Borgés vosi imitari
comu un poviru sturienti
chi copìa 'un capennu nenti !
Si tu leggi « U cani d'Argu »
lu romanzu è scrittu largu
e lu fici Bufalinu
cu lu Tavor-benzapinu !
Jò du' voti l'haiu liggiutu;
e 'un mi pari tantu argutu,
certamenti avrogghiu tortu,
ma mi pari chi l'abbortu
di la bedda cu-lu-lanzu
cuntaggiau tuttu 'u romanzu !
E quarcunu ancora riri
quannu ch'iddu persi i ciri;
s'i purtava sempri appressu
'un capennu ch'era persu
sulu 'u tempu ch'à spardatu
a copiari lu copiatu !
« Li minzogni di la notti »;
quattru stori vecchi e scotti
cci fruttau lu premiu Strega
ch'ora a nuddu cchiù si nega
e 'n atr'annu cu gran gala
l'avirrà puru Liala !