CRUCI DI FERRU

Cruci di ferru surata di cammisi,
riordu caru signu di gran firi,
misa a li peri di munti San Giulianu
ntra suli e luna vardi lu paisi.
Quannu dda sira vinnimu a priari
lu celu era tuttu priparatu,
prontu pi fari la binirizioni,
ali di ventu purtavanu lamentu
lamentu d’agunia di lu Signuri.
Granni timpesta, lampi, trona, scossi
comu dda tristi ura dda sò morti,
e mentri lu rusariu mmanu scurrìa
ntisi puru la chiantu di Maria.
Ogni vota chi passu di ssu locu
cu l’occhiu di lu cori la taliu
di ddi pirenni luci addumati
pari nasci cantu d’angiuliddi
chi ncoru cu li ciuri da campagna
cantanu… Vola, vola palumma bianca.