|
Ogni tantu mi veni lu disiu
passari di la strata dunni nasci,
chi pena ntra la cori miu
a villa riddutta d’accussì.
Scali e casi iunti tutti vecchi
e ntra li mura misi l’appuntiddi,
nun c’è cchiù lu puntinu di li checchi
e àiu quasi bianchi li capiddi.
La sira chi lampiuna addumati
ddu silenziu e strati sularini
pari c’abbitassiru li frati
chiusi su li finestri e purtalini.
Dunni sinn iu tutta dd’armunia?
ntra la notti li beddi sirinati?
ti penzu sempri cara Iurecca mia,
ia a la scola passannu di ssi strati.
Pi la festa di cannalivari
la Loggia di mascari vugghia,
tutti cu li chitarri a passiari
purtannu ntra li strati l’alliria.
Cu avia misa na bianca pacchiana
cu un fazzittuni e un cappiddazzu
cu na vistaglia sita da zà Tana
cu mascaratu cu pìzzu e mustazzu.
Cualcunu armava ncasa lu fistinu
ridennu tutti quanti a scialacori,
l’omini nto bicchireddu vinu
ammugghiavanu li duci mustazzoli.
La terza sira lu sinnacu affacciava
pi leggiri la lassitu di li nanni,
ogni pueta li sò parti recitava
e panneddi svulazzanti a tutti banni.
Arrivannu a la mezzannotti
li nanni salutavanu la cittati
e ntra vuci, tammura, trummi e botti
nta la piazza vinianu abbruciati.
Di quannu ci fu l’evoluzioni
finiù tutta l’originalità
di ddi beddi tempi e tradizioni
di quannu iu stavu ancora dda.
|
e-mail -