|
Lu Natali è un granni avvinimentu,
chiddu chi dicu è vera rialtà,
miraculu grannissimmu e purtentu
nasciu lu Re di la Santità.
Giuseppi e Maria li sò ginituri
cu gran primura e chini di pacenza
ficiru la strabuzza cu suduri,
costretti foru a fari penitenza.
San Giuseppi murtificatu e afflittu
tutti li porti ia a tuppuliari,
cu la so spusa tirava drittu
e mai nuddu li vosiru alluggiari.
La mezzannotti s’ia avvicinannu,
li mischineddi tantu si stancaru,
pi forti friddu stavanu agghiacciannu
tantu chi ntra na stadda s’arriddussaru.
San Giusippuzzu, l’amatu spusu,
nun sapia cchiù chi cosa fari,
vicinu a idda e tantu cunfusu
taliau ncelu e si misi a priari.
Va pi taliari e vitti na gran stidda
cu na gran cura longa e strallucenti,
la vitti pusari supra di la stadda
pi farici allustru a l’Onniputenti.
A mezzanotti lu figghiu nasciu,
ntra la mangiatura lu iu a pusari;
lu Bamminu saggiu nun chianciu
lu vo’ e l’asinu lu ficiru quariari.
Pi lampi, trona e nivi di piriri
s’arriparau puru un pastureddu
e appena chi trasiu, cu gran firi,
s’addinucchiau a lu Bammineddu.
Pi ddi biddizzi e dda granni rarità,
nisciu pi li loca assai cuntentu
e a li primi chi pi strata s’incuntra’
li misi a parti di stu granni eventu.
Comu ncantatu si misi a vuciari,
fu tanta la firi e tantu fu l’arduri,
tutta la genti si misi a chiamari:
-Viniti ccà, nasciu lu Sarvaturi.-
Ognunu ci purtaru cosi beddi,
e poi arrivaru li re magi
cu oru, ncenzu, mirra e prianneddi
s’addinucchiaru nta li sò paraggi.
St’jornu santu nun si pò scurdari,
jornu di firi e di tantu amuri,
cu lu Prisepiu nn’amu a ricurdari
l’amurusanza di lu Ridinturi.
Focu d’amuri mittemu ntra la braci
e priamulu addumannannu paci.
|
e-mail -