L’ULTIMU TRASPORTU DI MARIA

Riordu propriu comu fussi aeri
l’ultima sciuta chi fici la Maronna,
fu nta lu tempu di la me’ giuvintù,
st’avvinimentu nun lu scordu cchiù.
Supra lu carru e ntunnu tutta ciuruta
ravanti d’idda tanti bianchi frati
tirata a lentu passu di li voi
cunnuciuta pi tutta la nuttata
e di li carrabbineri sempri vardata.
Na granni prucissioni appressu a idda
e nui cu l’occhi chini di lacrimi
vuciannu tutti diciamu…
“Viva Maria S.S. di Trapani”.
Quasi a mità di strata
ddu beddi angiuliddi ’a ncurunaru
mentri un cantu miludiusu si sintia,
ddu duci cantu di l’Ave Maria.
Ncurunata comu na veru rigina
purtata fu a la chesa San Lorenzu,
all’ottu iorna turnau arrè a sò casa
e atturniata di genti d’ogni locu
tanti ciuri sbucciaru nta lu celu
e tuttu finiu cu lu iocu focu.