|
Quannu sentu na canzuna antica,
forti tuppulia lu me cori,
sentu c’arritornu arreri nica
tornanu a la menti vecchi stori.
Dda bedda armunia di Lucianu,
dda ncantata vuci di l’Abbati,
cu Tagliani dànnusi la manu
o u canto bidduni di Delfrati.
Di cazuni fu rigina Nilla,
Mudugnu cu dda vuci m’annacava,
lu tonu arditu di lu caru Villa
peni e affanni ognunu si scurdava.
Stu beddu radiu tuttu si rumpiu
dischi nun nni pozzu cchiù sunari,
mi lu disiassi ancora Santu Diu,
pi putirimi un pocu allianari.
Ora chi cchiù nun c’è ddu cantu veru,
pari chi mancassi quarchi cosa,
si penza chi i tempi brutti si nni eru
ma oggi unn’à profumu mancu a rosa.
E riru sulu pi faccifaria,
tinennu ntra lu cori st’addisiati,
dda campana cchiù nun tuppulia,
fineru li beddi tempi spinzirati.
Quannu lu pani si mangiava sulu,
e, puru si chiuvìanu li bummi,
si cantava cu la ragghiu di lu mulu
scanciannu lu vacili cu li lemmi.
|
e-mail -