A LU RE DI LA SALINA

Quanno la Musa ti vinni a truvari
a travagghiari subbitu ti mittisti,
n’ài fattu quanta rina c’è a ’mari,
ci nni su’ allegri e ci nn’ è puru tristi.

Nun sacciu siddu tu c’ài fattu casu
certi versi mi parinu figghioli,
senza littra ma fatti di bon nasu
sintenziannu la vita cu paroli.

Parlanu tantu di ddu tempu anticu
quannu n’accuntintavamu cu nenti
e anchi si lu nostru niru era nicu
lu parintatu era sempri prisenti.

D’estati, ntra li juccheni assitati,
cu l’acqua frisca di lu puzzareddu,
di mmernu nni passavanu sirati
cu lu caluri di lu cufuneddu.

Cu cori parli tantu dda salina
purtannutilla appressu nta la menti
e dunni vai l’allustri ncartulina,
cu gran piaciri t’ascutano la genti.

Nni parli a tutti di granni ncanti
macari nni Custanzo e Portobellu,
la vai purtannu ntunnu a tutti canti
comu pubblicità d’un Carusellu.

E quannu mettu sali ntra pignata
scinninu tò surura pi la via,
vugghi l’acqua, e cu vuci di fata,
cucennu canta la tò puisia.