Veni cu mmia, rammi la manu
ti vogghiu purtari n'on postu luntanu,
'unni li stiddi fannu chiù luci...
e nun si senti nè scusci, nè vuci.
Unni li sordi 'un servinu a nenti
e a tutti l'uri s'incontra la genti,
nuddu chi soffri e nenti duttura...
picchì la paci è 'mpiratura.

E 'ntà 'stu postu tantu luntanu
si và r'accordu e si strincin'a manu,
c'è 'na surgiva 'unni 'assumma l'amuri...
chi trasi 'n pettu e s'infila 'nto cori.
Jòcanu 'nsèmmula picciotti e vecchi
sunnu paraggi davanti a li specchi,
ognunu runa tuttu 'u sò beni...
suranu meli, senza vileni.

Si pò manciari di notti e di jornu
lu pani friscu è sempre 'nto furnu,
tutti ci stannu cu cuntintizza...
nuddu chi rischia e nenti s'appizza.
Cu è ci abbita havi tanti culura,
'un si travagghia e mancu si sura.
Veni cu 'mmia e 'un ti scantari...
chi 'n paradisu ti vogghiu purtari.

Vito Blunda 13/10/2007