Pi casu canuscistu a Ceu Simuni?
E a Nofriu, ntisu 'u figghiu di la Masa?
'U primu, era un granni sciampagnuni,
l'autru, avia na lingua... vilinusa.

Si senti diri chi jianu firriannu
ntê casi pi purtari l'alligria.
'I cunti chi sapianu, cuntannu,
'a genti l'ascutava... e già ridia.

A Ceu, chi a lu travagghiu ci sparava
e d'àtri cosi nenti ni vulia,
'u populinu spissu 'u pirdunava
picchì a taliallu già... s'addivittia.

Musioni ni facia com'era e jè
c''a panza, 'a facci e puru cu l'aricchi,
era "scurciatu" lu so zù Pepè...
chi 'u stissu facia 'n casa... di li ricchi.

Di Nofriu ni dicianu tutti beni
e caminannu, spissu, ricitava
e quannu chi "partia" 'un avia freni
si Ceu, cu forza... 'un si lu carricava.

E pari chi cu l'acqua era sciarriatu,
'i sordi ô joculottu si manciava,
so matri, l'avia spissu amminazzatu,
ma la taliava 'n facci... e scaccaniava.

Na vota, nta na festa "riccamata"
chi sulu 'i ricchi àppiru l' ammiti,
a tutti dui chiamaru p''a sirata
facennu diclamari..."cosi puliti".

Quannu finiu dda sort'i ripirtoriu
la genti si ni stava quasi jennu,
'a festa paria mezzu e chiù martoriu
na pocu cuminciaru... a fari 'u nfernu.

Chiddi vastasi, Nofriu, vulia cuntari
e jittau 'a chiù forti vuci chi ci vinni:
- Ora lu tempu s'avi avvastasari
e viatri fimmini:.. niscit'i minni!

A sti paroli tutti s'assittaru,
'i du' buffuna foru accuntintati,
sbafornî ni sinteru, ma scialaru
turnannu 'n casa tutti... scusciariati.