Successi, l'autru jornu a la marina
chi un bastimentu c'era di vattiari,
patruna eranu Vitu e Petru Spina
gran piscatura e... omini di mari.

Si priparau ogni cosa p''u fistinu
pi fari 'a megghiu fiura chi putia,
vinni ammitatu tuttu 'u populinu,
p'essicci granni festa... e cumpagnia.

Fu tuttu l'arsinali allicchittatu
cu 'i trummi, li banneri e 'u russu pannu,
'a genti 'u megghiu postu avia truvatu
mittennusi ntô parcu... d''u cumannu.

Quannu di lu discursu vinni l'ura,
lu populu si misi a baccaniari,
lu Sinnacu arrivau c''a so signura
picchì 'a parrina... idda l'avia a fari.

Lu Viscuvu finiu 'a binirizioni,
'u nastru d''u spumanti si tagghiau,
sanu turnau, com'era, 'u buttigghiuni,
la fimmina accussi... arrè 'u tirau.

Di voti, ci tintau na quinnicina,
mancu nzittau la varca, un corpu sulu!
Un omu, jittau na vuci a la parrina:
Signura, è megghiu chi... va rati 'u culu!