Spissu li picciriddi, taliannu 'i granni
copianu lu chiù tintu di li vizzi,
è ruinusu, cummina tanti danni,
però li fa sintiri... chiù grannuzzi!

Tri, cincu, deci, vinti, du' pachetti
si curri sempri s'iddu c'è 'u pinninu,
'i masculiddi criscennu fannu 'i sperti
'un penzanu chi poi... c'è 'u rivirsinu.

Lu sangu quantu chiù si v'addiccannu,
è letu picchì senti stu sapuri,
è 'a nicutina chi havi lu cumannu,
li teni 'n cruci comu lu Signuri.

Tra una e l'âtra, l'omu 'un si nn'adduna
chi certi voti su' quasi ncucchiati
e prima chi finisci l'âtra adduma,
mancu si ci l'avissiru... rialati.

Com'è chi 'u fumaturi 'un n''u capisci
lu dannu chi fa dintra 'u so pettu?
L'accupazioni di lu ciatu crisci
e quannu dormi... 'un havi mai risettu.

Ma quali vizziu, chissa è patrunanza!
Troppu rugnusa e tinta di livari!
'A testa, sempri 'a sicaretta penza
e li fa foddi... s''un si po fumari.