Un jornu, un patri sappi di so figghiu
chi avia ntinzioni forti di sturiari,
lassari Trapani, 'u so curtigghiu...
pi doppu prufissuri riturnari.

'A scola chi sirvia era luntana
e comu a idda, cca, mancu ci n'era,
a l'estiru, ô Granducatu di Tuscana...
'n menzu 'i muntagni nta na cantunera.

Partiu, ma chiancia sempri lu so cori:
la negghia 'ccuppunava spissu 'u suli,
'un si sintia lu ciauru di lu mari...
soccu manciava 'un avia sapuri.

Patri, scrivia lu giuvani sturenti,
mannatimi un cunortu, pi piaciri!
Liggennu sti palori suffirenti...
p''u trantulu, accuminciau a prijari.

Prestu junciu l'aiutu di li Santi:
pinzau di fari na granni bannera
cu 'i tri culura chiù rapprisintanti...
specchiu di sta citati, pi com'era:

virdi lu mari chi tutta l'attunnia,
biancu lu sali misu ntê munzeddi,
russu lu suli chi sempri la quaria...
e ventu chi accarizza li vaneddi.

Quannu la vitti, già s'arripigghiau
e fora d"a finestra 'a vosi 'mpisa,
ci parsi bedda, a ognunu ci piaciu...
"ritrattu" d''a so terra trapanisa.