'Un ci turnau a so casa Giuanninu
ed era 'a prima vota c''a lassava,
lu ficiru acchianari supra un trenu
pi fari lu surdatu... e poi turnava.

Lu pripararu pi na granni verra
e cu na scupettuzza vinni armatu,
lu Regnu avia bisognu d'autra terra
cu na cravatta virdi... fu mpupatu.

Scrivia a so matri amentri chi chiancia,
na lu so lettu, senza mai un cunortu.
Sprirava chi sta verra 'un si facia,
d"a nostra gran putenza... 'un era certu.

Poi vinni 'u tintu jornu chi partiu,
p''u scantu, si prijava 'n cumpagnia
c'un gran papuri all'Africa finiu
na lu disertu... unn'è la Tunnisia.

Si nn'avia jutu sulu a vintun'anni,
cu na facciuzza bedda chi riria.
Nta lu so pettu vosi fari danni,
na scupittata... e subitu muria.

Quann'u vinni a sapiri la famigghia
li fazzuletti 'un pottiru abbastari,
'u cori ci strinciu quantu na scagghia
e li santiuna... scinniri e acchianari.

Stu figghiu tantu bonu ci appizzaru,
pi la fuddia di Mussulinu e 'u Re.
A Tobruk, cu tanti autri, l'urvicaru,
ma 'u ciatu di so matri ddà nun c'è.

Giuanninu Brunna era lu figghiu bonu
di Ninu e di Ciccina Cannizzaru,
di stu picciottu 'un vi scurdati 'u nomu,
vivu si nn'ju... ma mortu 'un 'u turnaru.

Vito Blunda 20.11.2009