Nê spaddi porti muntagni di duluri
m'a facci tua è na granni maravigghia,
na l'occhi toi c'è 'u civu di l'amuri...
accussì ti vosi Diu, comu so figghia.

China di ciuri, Matri Addulurata,
suffremu cca cu tia stannuti a ciancu
li to massara fannu l'annacata...
pi fari arricriari a cu è già stancu.

Prima di tia passau to figghiu mortu
dintra un tabbutu biancu stinnigghiatu,
nuddu di niatri s'attruvau un cunortu...
sapennu comu st'omu fu trattatu.

'U cori nostru appi tantu scantu
e niatri ncuminciamu a trantuliari,
tu ni talìi e ni metti sutta 'u mantu...
dannuni la spiranza pi campari.

Vicinu a tia un postu ni circamu
p'aviri, contru 'u mali, na curazza;
li picciriddi appressu ni purtamu...
stannu vicini a nui manu manuzza.