Unni si, acidduzzu scantatu?
A circari ddu postu unni abbunna lu sali?
Unni 'u celu 'un havi culuri e 'un si senti lu scrusciu d''u mari?
Unni si, a miricariti 'i pinni?
A ripigghiariti di dda malatia chi struriu lu to stari?
E d'unn'è chi purtasti 'u to cantu?
A truvaru ddu chiamu, chi ti fu trarituri?
Unni si, a taliari l'ùmmira di chiddi chi 'un passanu chiù?
A vulari nta negghia chi ti nchiuriu la menti?
Unni si, giustu ddà, unni lu biancu d''a nivi annurvau lu to cori?
E na la so acqua gilata ci vulisti attruvari la notti?
Vola ancora, figghiu nguttumatu d''u ventu e
di ddà supra un bedd'aniru tu attrova:
abbasta chi po essiri, iddu sulu,
la to nova e còmmira casuzza.
deci anni doppu...
vito blunda 16 novembre 2007
Peppi Peppi, unni ti nn'jisti? Tu di 'n Trapani sparisti.
E c"u trenu, chianu chianu... ti nni turnasti ddà luntanu.
Pi circari la raggiuni di la to... mala stacjiuni.
Ddà a Turinu, l'aria è frisca,
ntê muntagni è virdi 'a frasca
l'acqua abbunna na li casi,
ma a tia, figghiu, nun ti vosi...
e turnasti ê to salini, senza sangu nta li vini,
senza sordi nê sacchetti, nè prisenti... nè pruggetti,
pi cunchiuriri 'a to sorti... jisti ddà, a circari la morti.
Vito Blunda 1997-2007
|