Na notti, chi lu ventu era ammanzitu,
si ntisi un corpu forti, un tuppuliuni:
«Cicciu - dissi Giuannina a so maritu -
vidi cu c'è dda sutta a lu purtuni.»

Subbitu d"a finestra s'affacciau.
Na sporta avia lassatu, un granni aceddu,
mancu tanticchia e ch'idda si muviu...
di cursa, jiu a pigghiari 'u sacchiteddu.

Taliannu 'n celu, l'armalu ringraziau.
«Papà, papà» Chiamava 'u nicareddu,
Cicciu, trimannu, 'n prescia s''u purtau...
l'avia caputu ch'era un picciriddu!

P''a cuntintizza tutti s'abbrazzaru:
Giuannina, Cicciu, Franca e Caterina,
'u ntressu ch'era masculu truvaru...
facennu festa finu a la matina.

Certu Giuannina, mancu s''u sunnava,
d'aviri na surprisa accussì granni,
stu masculiddu tantu l'aspittava...
ci vosi di priari durici anni.

Cuntentu puru fu lu vicinatu,
a cui sta bona nova ci mancava.
'u sonnu di Giuannina, arrinisciutu
e Cicciu, cuntintuni 'a ringraziava.

Idda, di stari mali 'un si scantava
ora chi 'a so famigghia facia festa,
ma lu duluri si la rusicava...
tutti li jorna c''u "duluri 'n testa".

Ma poi la vosi 'n celu lu Signuri,
pi avilla acciancu a latu di Maria,
ê figghi ci arristau tantu duluri...
e 'u cori chinu di malincunia!

Vito Blunda 13/06/2003-07