Parturuta di lu focu,
genti antica l'abbitau,
c''u sururi, poc'a pocu...
tuttu 'u locu assistimau.

'N menzu 'u mari cullucata,
civu di tutti li stiddi,
niura comu la nuttata...
paraddisu di l'aceddi.

È lu ventu 'u so patruni,
ci nasceru maravigghi,
e fra tanti cosi boni...
li chiù megghiu di so figghi.

Lu muscatu, chi gran vinu,
lu zibibbu di manciari
e la chiappara 'n jardinu...
ca si veni pi scialari.

Ch'è na perna lu sapiti
e si fussi fissaria?
Vui, vinennu ca scupriti...
chi è na gran juelleria!

Vito Blunda 09/10/2007