'A simmula, ntô lemmu,
si ncoccia cu la manu,
firriannu s'accarizza...
girannu pianu pianu.

S'accucchia a picca a picca,
si fannu 'i cudduredda,
mentri coci nta ghiotta...
'u scorfanu e 'a cipudda.

Quannu finiu 'a ncucciata,
c'è la passata d'ogghiu,
si jinchi 'a cuscusera...
s'assetta 'n capu 'u ntrugghiu.

Facci na riminata,
macari ogni mezz'ura,
cuntrolla 'a cudduredda...
c''un addiventa dura.

Di tempu ci nni voli,
cucennu cu vapuri,
c'acchiana di lu broru...
pi darici 'u sapuri.

Quann'è ch'è cottu è stancu
e s'avi a ripusari,
s'aspetta quasi un'ura...
è prontu pi manciari.

Livatici 'a cuperta,
rinchitivi li piatta,
pigghiativi 'a mappina...
alluntanati 'a jatta.

Grapitivi li argi,
cu agguriu va manciatu,
però biniriciti...
a cu l'ha cucinatu.

Vito Blunda 25/12/2007